«ԶՈՐԱՎԱՐ ՍԵՊՈՒՀ» ՊԱՏՄԱՔԱՂԱՔԱԿԱՆ ՎԵՐԼՈՒԾԱԿԱՆ ԿԵՆՏՐՈՆԻ ՊԱՇՏՈՆԱԿԱՆ ԿԱՅՔ

Վրաստանի արտաքին գործերի նախարար Մակա Բոչորիշվիլին հայտարարել է, որ Հայաստանի և Ադրբեջանի միջև նոր հաղորդակցային երթուղիների ստեղծման շուրջ ակտիվ քննարկումներ են ընթանում՝ ընդգծելով, որ նման զարգացումները կարող են դրական ազդեցություն ունենալ ողջ տարածաշրջանի համար։ Նրա խոսքով՝ որքան ավելանան տարածաշրջանային կապուղիները, այնքան կբարձրանա Հարավային Կովկասի ընդհանուր նշանակությունը Արևելք-Արևմուտք փոխադրումների համակարգում։ Միևնույն ժամանակ նախարարը շեշտել է, որ անհավանական է որևէ նոր երթուղի կարողանա փոխարինել Վրաստանին, քանի որ վրացական միջանցքը տարիների ընթացքում ձևավորվել, կայացել և ընդլայնվել է որպես կայուն ու փորձված տարանցիկ ուղի։

Բոչորիշվիլին նաև նշել է, որ բեռնափոխադրումների պահանջարկը շարունակաբար աճում է, և նույնիսկ եթե ստեղծվեն մի քանի նոր ուղիներ, դրանք դժվար թե բավարարեն Արևելք-Արևմուտք ուղղությամբ ընթացող ամբողջ բեռնաշրջանառությանը։ Նա հավելել է, որ որոշ շրջանակների փորձերը՝ Հայաստան-Ադրբեջան հարաբերությունները ներկայացնել Վրաստանի դեմ մրցակցային հարթության վրա, Թբիլիսիում ընկալվում են որպես շահարկում։ Վրաստանը, ըստ նրա, չի դիտարկում ընթացող գործընթացները որպես սպառնալիք սեփական տարանցիկ դիրքին և շարունակում է դրանք գնահատել տարածաշրջանային զարգացման համատեքստում։

https://1tv.ge/lang/en/news/georgia-will-not-vanish-from-map-no-new-route-can-replace-its-unique-strategic-role-says-foreign-minister/