Քրեական հեղինակություն համարվող Արտյոմ Կանևսկին արդարացվեց
Քրեական հեղինակություն համարվող Արտյոմ Հարությունովը՝ նույն ինքը Արտյոմ Կանևսկին արդարացվել է։
Երեկ Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, արդարացման դատավճիռ է կայացրել։
Հիշեցնենք, որ Արտյոմ Հարությունովը մեղադրվում էր ապօրինի զենք պահելու մեջ։ Ըստ մեղադրանքի՝ Կանևսկոյը իր կողմից օգտագործվող «Տոյոտա» մակնիշի ավտոմեքենայի մեջ ապօրինի պահել է Մյասնիկ Մատինյանի անվամբ հաշվառված, կրակելու համար պիտանի ակոսափող հրազեն հանդիսացող որսորդական ինքնաձիգ՝ իր պահեստատուփով, գործարանային արտադրության փամփուշտներ։ Նրա նկատմամբ որպես խափանման միջոց էր ընտրվել չհեռանալու մասին ստորագրությունը:
նշենք, որ դատախազ Հայկ Խաչատրյանը հիմնավորված էր համարել առաջադրված մեղադրանքը և դատարանին միջնորդել էր Հարությունովին դատապարտել ազատազրկման՝ 1 տարի 6 ամիս ժամկետով։
Պաշտպան Հովսեփ Սարգսյանն էլ միջնորդել էր՝ արդարացնել Հարությունովին։
