Ջրականի (Ջաբրայիլ) շրջանում այսօր հայտնաբերվել է եւս մեկ հայ զինծառայողի աճյուն
19/04/2021
Ջրականի (Ջաբրայիլ) շրջանում այսօր իրականացված որոնումների ընթացքում, Արցախի փրկարարները հայտնաբերել եւ տարհանել են եւս մեկ հայ զինծառայողի աճյուն։ Այս մասին տեղեկացնում է Արցախի արտակարգ իրավիճակների պետական ծառայությունը։
Նրա ինքնությունը պարզելու նպատակով կնշանակվի դատաբժշկական փորձաքննություն։
Այսպիսով, ռազմագործողությունների դադարից հետո Ադրբեջանի վերահսկողության տակ անցած Արցախի տարածքներից հայտնաբերված կամ ադրբեջանական կողմից փոխանցված զինծառայողների եւ քաղաքացիական անձանց աճյունների ընդհանուր թիվը դարձավ 1544։
