«ԶՈՐԱՎԱՐ ՍԵՊՈՒՀ» ՊԱՏՄԱՔԱՂԱՔԱԿԱՆ ՎԵՐԼՈՒԾԱԿԱՆ ԿԵՆՏՐՈՆԻ ՊԱՇՏՈՆԱԿԱՆ ԿԱՅՔ

Հայաստանում սահմանված հակահամավարակային կարանտինը երկարացվում է մինչև 2021 թվականի դեկտեմբերի 20-ը։ Այս որոշումը ՀՀ կառավարությունն ընդունել է այսօր գրավոր ընթացակարգով։

Ինչպես նշված է կառավարության կայքում հրապարակված որոշման մեջ, ՀՀ ամբողջ տարածքում ու պետական սահմանի անցման բոլոր կետերում 2020 թվականի սեպտեմբերի 11-ից մինչև 2021 թվականի հուլիսի 11-ը սահմանված կարանտինը կերկարաձգվի մինչև 2021 թվականի դեկտեմբերի 20-ը ներառյալ:

Որոշման ընդունումը պայմանավորված է աշխարհում տարածված կորոնավիրուսի 4 նոր մանրէահիմքերով (անգլիական, հարավաֆրիկյան, բրազիլական, հնդկական) ու դրանց ներթափանցումն ու տարածումը Հայաստանում կանխելու մտադրությամբ։

Որոշման հիմնավորումներում նաև նշվում է, որ Հայաստանում համաճարակային իրավիճակն այս պահի դրությամբ կայուն է, վերջին 14 օրվա ընթացքում նկատվում է հիվանդացության մակարդակի նվազում, իսկ թեստերի դրական արդյունքների մասնաբաժինը կազմում է 3.6%, ինչով, ըստ Եվրամիության չափանիշների, Հայաստանը դասվում է «դեղին գոտում» գտնվող երկրների շարքը։

Կառավարությունը չի բացառում, որ համաճարակային իրավիճակի շարունակական դիտարկման արդյունքում առողջապահության նախարարությունը դրա ընթացքում կներկայացնի կանխարգելիչ միջոցառումների, սահմանափակումների մեղմացմանը կամ խստացմանն ուղղված առաջարկներ։