Էրդողանին իբր վիրավորելու մեղադրանքով Թուրքիայում քուրդ երեխա է ձերբակալվել
Հինգշաբթի օրը Թուրքիայում 14-ամյա քուրդ երեխա է բերման ենթարկվել սոցցանցերում տեսանյութում նախագահ Ռեջեփ Թայիփ Էրդողանին վիրավորելու մեղադրանքով: Տղան ազատ է արձակվել ուրբաթ ուշ երեկոյան:
Հոր ՝ Սեբարի խոսքով, հինգշաբթի օրը Սերհաթ Թասին ոստիկանությունը բերման է ենթարկել իր տնից: Դա տեղի է ունեցել այն բանից հետո, երբ նա TikTok- ում տեղադրել է Էրդողանի, Թուրքիայի ներքին գործերի նախարար Սուլեյման Սոյլուի և Իրաքի նախկին բռնապետ Սադամ Հուսեյնի համատեղ տեսանյութը, ինչպես նաև լեգենդար քուրդ գործիչների նկարներ, ինչպիսիք են երգիչ Ահմեդ Քայան:
Ուրբաթ օրը Սեբարը Rûdawին ասաց, որ ոստիկանությունը հարցաքննության ժամանակ սպառնացել է իր որդուն: Երեխային հարցրել են նաև, թե արդյոք նրա ընտանիքը կապ ունի Քրդստանի աշխատավորական կուսակցության (PKK) հետ, որը զինված խմբավորում է և պայքարում է Թուրքիայում քրդերի հզորացման համար:
«Այս հարցերը ոչ մի կապ չունեն ոչ նրա, ոչ էլ գործի հետ: Նրան շանտաժի են ենթարկել և սպառնացել, որ բանտից ազատվելիս կարող է սեռական բռնության ենթարկվել», - ասաց Սեբարը` նշելով, որ իր որդին հրաժարվել է ներողություն խնդրել տեսանյութի համար `անազատության մեջ գտնվելու ընթացքում:
Նա հոգեբանական թեստերից հետո ազատ է արձակվել, բայց 15 օր անց դատարանի առջև կկանգնի: Ոստիկանությունը հորն ասաց, որ իր որդուն ավելի շուտ կձերբակալեին, եթե երկրում չլինեին կորոնավիրուսի հետ կապված կարանտիններ: Անհայտ է, արդյոք նա կրկին կկալանավորվի:
Թուրքիայի իշխանությունները որեւէ կերպ չեն մեկնաբանել Սերհատի գործը:
Թարգմանություն՝ Մելինե Մարկոսյան
