Իրանը պատրաստ է աջակցելու խաղաղության և կայունության հաստատման գործընթացին. Վաեզի
Իրանի նախագահի վարչակազմի ղեկավար Մահմուդ Վաեզին անդրադարձել է Լեռնային Ղարաբաղում հրադադարի հաստատմանն ուղղված ջանքերին և գնահատել Ռուսաստանի դերակատարությունը:
«Մեր տարածաշրջանն ունի անհրաժեշտ հնարավորությունները խնդիրների կարգավորման և անվտանգության ու խաղաղության ապահովման համար: Մոսկվայում Ադրբեջանի և Հայաստանի ԱԳ նախարարների բանակցությունները անկախ տարածաշրջանային տերությունների ներուժի լավ նախանշան են: Իրանը պատրաստ է աջակցելու խաղաղության և կայունության հաստատման գործընթացին՝ միջազգային իրավունքի համաձայն»,- «ԻՐՆԱ» գործակալության փոխանցմամբ՝ իր թվիթերյան էջում գրել է Վաեզին:
Վերջինս նաև շնորհակալություն է հայտնել Ռուսաստանին միջնորդական ջանքերի համար և ողջունել հրադադարի մասին համաձայնությունը: «Հուսով ենք, որ խաղաղ բանակցությունները կսկսեն հնարավորինս շուտ»,- հավելել է իրանցի պաշտոնյան:
