Թրամփն իր մասին «անձնական և մութ պատմություններով» լի գրքի հրատարակման մասին հայտարարությունից հետո ծրագրում է դատի տալ եղբոր դստերը
<p>ԱՄՆ նախագահ Դոնալդ Թրամփը ծրագրում է դատի տալ իր եղբոր դստերը՝ Մերի Թրամփին, իր մասին անձնական տեղեկություններով և «մութ պատմություններով» լի գիրք հրատարակելու մասին հայտարարութունից հետո, հայտնում է <a href="https://www.dailymail.co.uk/news/article-8429643/Donald-Trump-looking-sue-niece-Mary-tell-book-signed-NDA.html?ito=social-facebook&fbclid=IwAR0_IXvDfQrE68U6IhrDdCEFuHdHvLLKOYyPvDwumZNHbP9G8KyfdQfn2w8" rel="nofollow" target="_blank">Daily Mail</a> պարբերականը։</p> <p>Աղբյուրը մանրամասնում է, որ այժմ 74-ամյա նախագահը մտադիր է օրինական գործողություններ ձեռնարկել Մերի Թրամփի դեմ, քանի որ դեռևս 2001 թվականին վերջինս մի փաստաթուղթ է ստորագրել, որով պարտավորվել է երբևէ չխոսել իր և նախագահի հարաբերությունների մասին։</p> <p>Նշվում է, որ երեքշաբթի ԱՄՆ կառավարությունը դատի է տվել նախագահի ազգային անվանգության հարցերով նախկին խորհրդական Ջոն Բոլթոնին, որը նույնպես այս ամառ պատրաստվում է Թրամփի վարած ոչ հաջող քաղաքականության մասին գիրք հրատարակել։ Սակայն եթե այս պարագայում խոսքը նախագահի քաղաքական գործունեության մասին է, ապա Մերի Թրամփն իր գրքում պատմում է, թե «ինչպես է իր ընտանիքը ստեղծել աշխարհի ամենավտանգավոր մարդուն», խոսվում է նախագահի ընտանիքի, հարազատների հետ ունեցած հարաբերությունների և անցած ուղու մասին, նկարագրում է նրա մարդ տեսակը։</p> <p>«Սա ընտանիքի մասին է, սա անձնական դավաճանություն է»,- գրքի մասին իր կարծիքն է հայտնել Թրամփի նախկին խորհրդականներից մեկը՝ Սեմ Նուբերգը։</p> <p>Ինչպես ավելի վաղ հայտնել է <a href="https://www.tert.am/am/news/2020/06/16/Trump/3318750?fbclid=IwAR1OdS0-OP04SEBJjXfL8tbCXhWU-5WDwgKgxum7RF-lOe_qVo9fwCeVcKo">Tert.am</a>-ը, Դոնալդ Թրամփի եղբոր դուստրը պատրաստվում է Simon & Schuster հրատարակչական ընկերության հետ համագործակցության շրջանակում ամռանը հրատարակել գիրքը։</p> <p>Հրատարակչությունը գիրքը նկարագրել է որպես «Դոնալդ Թրամփի անկեղծ, ազդեցիկ դիմանկար»՝ ընդգծելով, որ Մերի Թրամփը «լույս է սփռում իրենց ընտանիքի մութ պատմությունների վրա, բացատրում է, թե ինչպես է իր հորեղբայրը դարձել այն մարդը, որն այժմ սպառնում է աշխարհի առողջապահությանը, տնտեսական անվտանգությանն ու սոցիալական կառուցվածքին»։</p> <p>Too Much And Never Enough: How My Family Created the World’s Most Dangerous Man («Չափից շատ և երբեք բավարար չէ։ Ինչպես է իմ ընտանիքը ստեղծել աշխարհի ամենավտանգավոր մարդուն») վերնագրով գիրքը լույս կտեսնի նախագահական ընտրություններից ընդամենը մի քանի ամիս առաջ։</p> <p>Հեղինակի խոսքով՝ նա իր մանկության մեծ մասն անցկացրել է Թրամփի շրջապատում՝ այդ տարիներն անվանելով «մղձավանջային, կործանարար և չարաշահման և անտարբերության ողբերգական համադրություն»։</p> <p>Մերի Թրամփը Թրամփի հանգուցյալ եղբայր Ֆրեդ Թրամփ կրտսերի դուստրն է։</p> <p> </p> <p>Աղբյուրը՝ Tert.am</p> <p>Կայքը՝ Generalnews.am</p>