Բայդենի հայտարարությունը միջազգային իրավահարաբերություններում դարձել է կարևոր գործոն․ «Հայաստանի Հանրապետություն»
«Հայաստանի Հանրապետություն» թերթը գրում է.
«Բայդենի կողմից ցեղասպանության ճանաչումը, բնականաբար, քաղաքական գնահատական է եւ ունի քաղաքական շարժառիթներ: Այն արդյունք է ստեղծված աշխարհաքաղաքական իրավիճակի, որի հիմքում Թուրքիայի՝ քաղաքակիրթ աշխարհի համար սպառնալիք համարվող ծավալապաշտական գործողություններն են: Իսկ վերջինիս պատճառը նրա՝ նախկինում իրականացրած նման գործողություններին համարժեք գնահատականի չարժանացնելն է եղել:
Պատահական չէր Ջո Բայդենի այն հայտարարությունը, որ նման ոճրագրոծություններն ապագայում չկրկնվելու համար են արվում: Անկախ նրանից, թե ինչ իրավական շարունակություն կունենա Բայդենի հայտարարությունը ԱՄՆ-ում, այն արդեն միջազգային իրավահարաբերություններում դարձել է կարեւոր գործոն: Ցեղասպանության ճանաչման որոշումը գործուն միջոց է Էրդողանի ցնորամիտ գաղափարները կյանքի կոչելուն խանգարելու համար:
Գերտերության այս գործողությունն ուղենիշ կլինի նաեւ մյուս ազդեցիկ պետությունների համար՝ Թուրքիայի հետ հարաբերվելիս: Առաջնայինը, սակայն, մեր համար այն է, որ կատարվել է եւս մեկ մեծ քայլ Հայ ժողովրդի ու մարդկության դեմ գործած ոճրագործությունը ճանաչելու, համարժեք գնահատական տալու եւ մինչեւ այսօր նման գործելակերպի շարունակվող քաղաքականության կանխման ուղղությամբ»:
