ԱՊՀ ԱԳՆ խորհուրդը պայմանավորվել է տարբեր միջազգային հարթակներում համատեղ քայլերի կոորդինացման հարցում. Լավրով
ՌԴ ԱԳ նախարար Սերգեյ Լավրովը ԱՊՀ արտաքին գործերի նախարարների խորհրդի հերթական նիստից հետո ասել է, որ այն լավ հնարավորություն էր՝ գնահատելու 30 տարիների աշխատանքն ու նախանշելու հետագա աշխատանքի ուղղությունները: ՌԴ արտաքին գերատեսչության ղեկավարը հիշեցրել է, որ այս տարի կառույցը նշում է իր 30-ամյակը:
Լավրովը հայտնել է, որ արտաքին քաղաքականության տեսանկյունից կարևոր էր ԱՊՀ պետությունների ԱԳՆ-ների միջև համագործակցության ակտիվացման ծրագրի կատարման ընթացքի ուսումնասիրումը: Նա ասել է, որ այդ եռամյա ծրագիրն ընդունվել էր 2020 թ.՝ Թուրքմենստանի նախաձեռնությամբ:
«Պայմանավորվել ենք շարունակել համատեղ հայտարարությունների ընդունման փորձը՝ միջազգային կազմակերպություններում դրանք տարածելու նպատակով: Որպես թարմ օրինակ նշեմ մարտի 18-ին ԱՊՀ անդամ երկրների արտգործնախարարների ընդունած հայտարարությունը միջազգային իրավունքի ամրապնդման վերաբերյալ, որը մենք արդիական ենք համարում մի իրավիճակում, երբ որոշ արևմտյան երկրներ փորձում են միջազգային իրավունքը փոխարինել կանոնների վրա հիմնված ինչ-որ կարգերով»,- նշել է ՌԴ արտգործնախարարը:
Նա հայտարարել է, որ ԱՊՀ ԱԳ նախարարների խորհրդի նիստում պայմանավորվածություն են ձեռք բերել կոորդինացնել քայլերը տարբեր միջազգային հարթակներում՝ ՄԱԿ-ում, ԵԱՀԿ-ում և այլն:
Սերգեյ Լավրովը հայտնել է, որ ապրիլի 2-ի նիստում հաստատել են հանցավոր եկամուտների լվացման, ահաբեկչության ֆինանսավորման, զանգվածային ոչնչացման զենքի տարածման հակազդման համաձայնագրի նախագիծը: «Ընդունել ենք նաև մի շարք որոշումներ ռազմական, հումանիտար ոլորտներում, այդ թվում՝ համագործակցություն երիտասարդական փոխանակումների, ֆիզիկական կուլտուրայի և սպորտի ոլորտներում»,- հայտնել է ՌԴ արտաքին քաղաքական գերատեսչության ղեկավարը:
Նա նաև հիշեցրել է, որ այս տարվա հունիսի 22-ին լրանում է Հայրենական մեծ պատերազմի մեկնարկի 80-րդ տարելիցը: Լավրովը հույս է հայտնել, որ ԱՊՀ անդամ երկրների ղեկավարները կհասցնեն մինչև հունիսի 22-ը ստորագրել այդ կապակցությամբ ԱԳ նախարարների խորհրդի համատեղ հայտարարությունը, որը կպատրաստվի առաջիկայում:
Հեղինակ`Դավիթ Մուրադյան