12 երկրների զինվորականներ ժամանել են Ռուսաստան` մասնակցելու Հաղթանակի զորահանդեսին
<p>Տասներկու երկրներից զինվորականներ ժամանել են Ռուսաստան` մասնակցելու հունիսի 24-ին Մոսկվայի Կարմիր հրապարակում տեղի ունենալիք Հայրենական Մեծ պատերազմում տարած հաղթանակի 75-րդ հոբելյանին նվիրված զորահանդեսին: Այս մասին <a href="http://redstar.ru/stroevaya-vypravka-priblizhaetsya-k-idealu/" rel="nofollow" target="_blank">«Կարմիր աստղ»</a> պարբերականին տված հարցազրույցի ընթացքում տեղեկացրել է ՌԴ ցամաքային զորքերի գլխավոր հրամանատար, բանակի գեներալ Օլեգ Սալյուկովը, որը գլխավորելու է զորահանդեսը:</p> <p>Խոսքը Հայաստանի, Ադրբեջանի, Բելառուսի, Ղազախստանի, Ղրղզստանի, Չինաստանի, Մոլդովայի, Մոնղոլիայի, Սերբիայի, Տաջիկստանի, Թուրքմենստանի և Ուզբեկստանի պատվիրակությունների մասին է:</p> <p>Սպասվում է, որ զորահանդեսին կմասնակցի ավելի քան 13 000 զինվորական, կներգրավվի 234 միավոր ժամանակակից և պատմական ցամաքային ռազմական տեխնիկա, այդ թվում` տանկերի աջակցության «Տերմինատոր» ռազմական մեքենաներ, «Կոալիցիա-ՍՎ» և «Մստա-ՍՄ» ինքնագնաց հաուբիցներ, Տ-90Մ և «Արմատա» տանկեր, «Բուկ-Մ3», «Տոր-Մ2» և Ս-400 զենիթահրթիռային համակարգեր, ինչպես նաև 75 ինքնաթիռ ու ուղղաթիռ:</p> <p>Հանդիսատեսը կտեսնի նաև 1945 թվականի հունիսի 24-ի պատմական զորահանդեսի որոշ տարրեր: Օրինակ` զորահանդեսի սկզբում կկատարվի «Հոբելյանական երթը»: Զորահանդեսի նվագախումբը կազմված կլինի 900 երաժիշտներից:</p> <p>ՌԴ նախագահ Վլադիմիր Պուտինը Հաղթանակի 75-ամյակին նվիրված զորահանդեսը որոշել էր հետաձգել կորոնավիրուսի համավարակի պատճառով: Մայիսի վերջին նա զորահանդեսը նշանակել էր հունիսի 24-ին:</p> <p>ՀՀ վարչապետ Նիկոլ Փաշինյանը հունիսի 24-ին Մոսկվայում <a href="https://www.tert.am/am/news/2020/06/09/pashinyan-parade/3311730?fbclid=IwAR0IN5YSh70DV28f2BXRjNw_sbHaZ8u7VrBI1enmDU_mtdXTH1F1501Bml8">կմասնակցի</a> Հայրենական Մեծ պատերազմում տարած հաղթանակի 75-րդ հոբելյանին նվիրված զորահանդեսին:</p> <p> </p> <p>Աղբյուրը՝ Tert.am</p> <p>Կայքը՝ Generalnews.am</p>