Հայաստանի կողմից ՄԻԵԴ ներկայացված միջպետական գանգատները քննության փուլ են մտնում
Ռազմագերիների, անհետ կորած անձանց կամ ենթադրյալ գերեվարված 280 անձի վերաբերյալ Հայաստանը հրատապ միջոց կիրառելու խնդրանք է ներկայացրել ՄԻԵԴ՝ «Ռադիոլուրի» հետ զրույցում ասել է ՄԻԵԴ- ում ՀՀ ներկայացուցիչ Եղիշե Կիրակոսյանը։ Նրա խոսքով՝ 280 անձանց մի մասը վերադարձել է, մի մասն անհետ կորածներ են, մյուս մասի նկատմամբ Ադրբեջանում ապօրինի դատավարություններ են ընթանում։
ՀՀ կառավարությունը ՄԻԵԴ-ին դիմել է նաև Բաքվում ընթացող դատավարությունների նյութերին ծանոթանալու խնդրանքով։ Կառույցի միջնորդությամբ Ադրբեջանից պահանջվում է հայկական կողմին հնարավորություն տալ ծանոթանալու խայտառակ գործերի նյութերին։
«Ակնկալվում է նաեւ միջամտություն՝ դադարեցնելու այդ շինծու դատավարությունները։ ՀՀ –ն այս հարցերի պատասխանն ակնկալում է առաջիկայում»,- ասել է Եղիշե Կիրակոսյանը։
ՀՀ–ի կողմից ՄԻԵԴ է ներկայացվել նաև միջպետական երկու գանգատ՝ «Հայաստանն ընդդեմ Ադրբեջանի» և «Հայաստանն ընդդեմ Թուրքիայի»։ Դրանք Մեծ պալատի վարույթում են, ըստ Կիրակոսյանի՝ արդեն մոտենում են քննության փուլին, առաջիկայում ակնկալվում է ժամկետների սահմանում դատարանի կողմից։
Միջպետական գանգատներով վճիռներն ակնկալվում են 3–4 տարվա ընթացքում՝ ասաց Եղիշե Կիրակոսյանը։
