«ԶՈՐԱՎԱՐ ՍԵՊՈՒՀ» ՊԱՏՄԱՔԱՂԱՔԱԿԱՆ ՎԵՐԼՈՒԾԱԿԱՆ ԿԵՆՏՐՈՆԻ ՊԱՇՏՈՆԱԿԱՆ ԿԱՅՔ

Ջո Բայդենը Պենտագոնին հանձնարարել է սկսել Պարսից ծոցի տարածաշրջանից անձնակազմի և սարքավորումների դուրսբերումը: Այս քայլը իր գլոբալ ռազմական ներկայությունը Մերձավոր Արևելքից այլ ուղղություններ վերակողմնորոշելու Վաշինգտոնի ձգտման առաջին քայլն է, գրում է The Wall Street Journal-ը:
Միացյալ Նահանգներն արդեն դուրս է բերել տարածաշրջանից առնվազն երեք Patriot հակահրթիռային մարտկոց: Դրանցից մեկը գտնվում էր Սաուդյան Արաբիայի ավիաբազաներից մեկում և վերջին տարիներին ծառայում էր ամերիկյան զորքերը պաշտպանելու համար, գրում է պարբերականը:
Պաշտոնյաների խոսքով` զենքերի մի մասը, ներառյալ ավիակիրը և հսկողության համակարգերը, նույնպես վերաբաշխվում են Մերձավոր Արևելքից աշխարհի այլ մասեր «ռազմական կարիքները բավարարելու համար»: Միևնույն ժամանակ, դիտարկվում է տարածաշրջանում ռազմական ներկայության հետագա կրճատման հնարավորությունը:
Ավիակրի մշտական ներկայության դադարեցումը, զուգորդված Patriot մարտկոցների և այլ սարքավորումների հետզհետե դուրսբերմամբ, նշանակում է, որ մի քանի հազար զինվոր կարող է ի վերջո լքել տարածաշրջանը: Իրանի ու Թրամփի վարչակազմի միջև լարվածության թեժ պահին տարածաշրջանում տեղակայված էր 90 000 ԱՄՆ զինծառայողներ, բայց անցյալ տարվա վերջին դրանց թիվը իջեցվել է 50 000-ի:
Պաշտոնյաները բացատրում են, որ դուրսբերումը Բայդենի վարչակազմի ջանքերի վաղ փուլն է Մերձավոր Արևելքում ԱՄՆ դիրքերը թուլացնելու ուղղությամբ: Որոշ սարքավորումներ, ներառյալ անօդաչու թռչող սարքերը և հակահրթիռային պաշտպանության մարտկոցները, կարող են վերաբաշխվել՝ կենտրոնանալու նրանց վրա, որոնց Վաշինգտոնը համարում է իր հիմնական մրցակիցները, ներառյալ Չինաստանը և Ռուսաստանը: