Ոստիկանները բացահայտել են ապօրինի թմրաշրջանառության հերթական շղթան
<p>Օրերս ոստիկանները թմրաշրջանառության հերթական շղթան բացահայտեցին։</p> <p>Հունիսի 8-ին ոստիկանության Երևան քաղաքի վարչության ծառայողները, ապօրինի թմրանյութ պահելու և օգտագործելու կասկածանքով, ոստիկանություն բերման ենթարկեցին 52-ամյա մի տղամարդու։ Այս մասին հայտնում են ՀՀ ոստիկանությունից։</p> <p>Նրա անձնական խուզարկությամբ հայտնաբերվեց «Բ8» գրառմամբ սուբուտեքսի նմանվող 4 հաբ, «Մ» գրառմամբ մեթադոն թմրամիջոցի նմանվող 9 հաբ և մարիխուանայի նմանվող զանգվածներով 4 փաթեթ։ Ոստիկանների ձեռնարկած միջոցառումներով պարզվեց, որ սուբուտեքս թմրամիջոցը տղամարդը ձեռք էր բերել Աբովյանում։</p> <p>Հարուցվեց քրեական գործ։ Բերման ենթարկված տղամարդը ձերբակալվեց, իսկ ոստիկանները շարունակեցին օպերատիվ միջոցառումները։</p> <p>Ոստիկանները պարզեցին, որ տղամարդուն թմրամիջոցն իրացրել են Աբովյանի 40-ամյա և Զառ գյուղի 35-ամյա բնակիչներ։ Նրանք հունիսի 10-ին, թմրանյութ իրացնելու կասկածանքով, բերման ենթարկվեցին ոստիկանություն։ Աբովյանի 40-ամյա բնակչի անձնական խուզարկությամբ հայտնաբերվեց «Բ8» գրառմամբ 3 դեղահաբ։ Նա ձերբակալվեց։ Դատարանի որոշմամբ ոստիկանները խուզարկեցին նրա «Նիսան» մակնիշի մեքենան։ Սրահից հայտնաբերվեցին սուբուտեքսի նմանվող դեղահաբի կտոր, թմրամիջոցի նմանվող հեղուկով ներարկիչներ։</p> <p>Ոստիկանները խուզարկեցին նաև նրա «ԲՄՎ» մեքենան, որտեղից հայտնաբերվեցին դեղահաբի կտորներ։</p> <p>Նշանակվել են փորձաքննություններ։ Հարուցված քրեական գործի նախաքննությունը շարունակվում է։</p> <p> </p> <p>Աղբյուրը` Tert.am</p> <p>Կայքը` Generalnews.am</p>
